మీ సామాన్లు స‌ర్దుకుని వెళ్లిపోండి.. తొల‌గించిన ఉద్యోగుల‌కు మెటా ఫైన‌ల్ మెసేజ్‌

"దురదృష్టవశాత్తు, నేటి పునర్‌వ్యవస్థీకరణలో భాగంగా మీ ఉద్యోగం తొలగించబడింది" కొన్ని వారాలుగా మెటా ఉద్యోగులు భయపడుతున్న వాక్యం ఇది. బుధవారం తెల్లవారుజామున 4 గంటలకు వేలమంది ఉద్యోగుల ఇన్‌బాక్స్‌లో ఈ ఈమెయిల్ ప్రత్యక్షమైంది. దీంతో పాటు "ఒకవేళ మీరు ఆఫీసులో ఉంటే, దయచేసి మీ వ్యక్తిగత వస్తువులను తీసుకుని ఇంటికి వెళ్లండి" అనే మరో వాక్యం వారిని తీవ్ర దిగ్భ్రాంతికి గురిచేసింది.

టెక్ దిగ్గజం మెటా సుమారు 8,000 మంది ఉద్యోగులను (మొత్తం ఉద్యోగులలో 10%) తొలగిస్తూ ఈ సంచలన నిర్ణయం తీసుకుంది. అదే సమయంలో 7,000 మందికి పైగా ఉద్యోగులను ఆర్టిఫిషియల్ ఇంటెలిజెన్స్ (ఏఐ) ప్రాజెక్టులకు బదిలీ చేసింది. కంపెనీని మరింత సమర్థవంతంగా నడపడానికి, ఏఐ వంటి రంగాలలో చేస్తున్న భారీ పెట్టుబడులను భర్తీ చేయడానికి ఈ తొలగింపులు అవసరమని మెటా తన ప్రకటనలో పేర్కొంది.

ఈమెయిల్ అందుకున్న ఉద్యోగుల యాక్సెస్ బ్యాడ్జ్‌లను తక్షణమే డియాక్టివేట్ చేశారు. కంపెనీ అంతర్గత సిస్టమ్స్‌కు వారి యాక్సెస్‌ను కూడా నిలిపివేశారు. గంటలోపే వారిని మెటా "అలుమ్నై పోర్టల్"కు అనుసంధానించారు. అక్కడ సెవరెన్స్ ప్యాకేజీ, వీసా, ఆరోగ్య బీమా, ఉద్యోగ సహాయం వంటి వివరాలు పొందుపరిచారు. "మెటా ప్రయాణంలో మీ పాత్ర ఎంతో ముఖ్యమైనది" అని ఈమెయిల్‌లో పేర్కొనడం గమనార్హం.

భారంగానే ఈ నిర్ణయం తీసుకున్నా: జుకర్‌బర్గ్
ఈ పరిణామాలపై ఉద్యోగులకు పంపిన మరో మెమోలో సీఈఓ మార్క్ జుకర్‌బర్గ్ స్పందించారు. "కంపెనీ నిర్మాణంలో పాలుపంచుకున్న వారికి వీడ్కోలు పలకడం ఎప్పుడూ బాధాకరమే. ఈ నిర్ణయం నాకెంతో భారంగా ఉంది" అని ఆయన పేర్కొన్నారు. అయితే, ఈ ఏడాది మరోసారి కంపెనీ వ్యాప్తంగా ఉద్యోగాల కోతలు ఉండవని ఆయన హామీ ఇచ్చారు. భవిష్యత్తును నిర్దేశించగల అతికొద్ది కంపెనీలలో మెటా ఒకటని, ప్రపంచవ్యాప్తంగా వినియోగదారుల కోసం 'పర్సనల్ సూపర్‌ఇంటెలిజెన్స్' నిర్మించడమే తమ లక్ష్యమని పేర్కొన్నారు.

భారీ సెవరెన్స్ ప్యాకేజీ
ఉద్యోగం కోల్పోయిన వారికి మెటా భారీ సెవరెన్స్ ప్యాకేజీని ప్రకటించింది. దీని కింద 16 వారాల బేసిక్ జీతంతో పాటు కంపెనీలో పనిచేసిన ప్రతి సంవత్సరానికి అదనంగా రెండు వారాల జీతాన్ని చెల్లిస్తారు. అలాగే, ఉద్యోగులకు, వారి కుటుంబ సభ్యులకు 18 నెలల పాటు హెల్త్ ఇన్సూరెన్స్ ప్రీమియంలను కంపెనీయే భరిస్తుంది. వీసాలపై పనిచేస్తున్న ఉద్యోగులకు, ముఖ్యంగా H-1B వీసాదారులకు, ఇమ్మిగ్రేషన్ మార్గదర్శకత్వం కోసం న్యాయ సంస్థల వివరాలను 'అలుమ్నై పోర్టల్‌'లో అందుబాటులో ఉంచినట్లు మెటా తెలిపింది.

2022-23లో మార్క్ జుకర్‌బర్గ్ చేపట్టిన 'ఇయర్ ఆఫ్ ఎఫిషియెన్సీ' తర్వాత ఇదే అతిపెద్ద తొలగింపుల ప్రక్రియ. ఆ సమయంలో సుమారు 21,000 మంది ఉద్యోగాలు కోల్పోయారు. ఇప్పుడు ఏఐ రంగంలో భారీగా పెట్టుబడులు పెడుతున్న తరుణంలో ఈ నిర్ణయం తీసుకోవడం టెక్ వర్గాల్లో చర్చనీయాంశంగా మారింది. ఈ ఏడాది ఏఐ ఇన్‌ఫ్రాస్ట్రక్చర్‌పై మెటా 125 బిలియన్ల నుంచి 145 బిలియన్ల డాలర్ల వరకు ఖర్చు చేయనున్నట్లు అంచనా. ఈ తొలగింపులు, అంతర్గత బదిలీల కారణంగా మెటాలోని ప్రతి ఐదుగురు ఉద్యోగులలో ఒకరు ఈ పునర్‌వ్యవస్థీకరణ వల్ల ప్రభావితమవుతున్నారు.